İçərisində xəstə olmadığı halda “Kəpəz Hospital”a məxsus ambulansla işıqforun qırmızı işığında keçən və bununla da bədbəxt hadisəyə səbəb olan sürücünün məhkəmə prosesi başa çatıb.



Xeberpost bildirir ki, Xitab24.az-ın əldə etdiyi məlumata görə, təqsirləndirilən Şahin Mustafayev 5 il 2 ay müddətinə azadlıqdan məhrum edilib.



Məlum olub ki, 1991-ci il təvəllüdlü Ş.Mustafayev hadisə günü “Kəpəz Hospital”ın müdiriyyətinin tapşırığı əsasında 77- JB-277 dövlət qeydiyyat nişanlı “Ford Tranzit” markalı ambulansla “Sumqayıt Hospital”a sənəd (!) aparıb.



Sürücü bu zaman ambulansda xəstə olmadığı halda sayrışan ışıqları yandırıb. O, eyni zamanda, səsgücləndirici siqnallardan istifadə edərək işıqforun qırmızı işığında keçib və sol yoldan, yəni İlham Hacıyev küçəsində yaşıl işıqda hərəkət edən gələn mopedi vurub.



Şahin Mustafayev mopedin çoxsaylı xəsarətlər alan sürücüsü 19 yaşlı Xaliv İbrahimovu “Kəpəz Hospital”a çatdırsa da, onun həyatını xilas etmək mümkün olmayıb.



Məhkəmə mərhumun anası Hicran İbrahimova da ifadə verib. O, ifadəsində “Kəpəz Hosiptal”ın həkimlərini də ittiham edərək, yaralı halda olan oğluna klinikada düzgün tibbi yardımı göstərilmədiyini bildirib. Bundan başqa, H.İbrahimova təqsirləndirilən şəxslə barışmadığını, ona ən ağır cəzasının verilməsini istəyib.



O da məlum olub ki, Binəqədi rayonu ərazisində baş verən hadisə zamanı Şahin Mustafayev yaşayış sahəsində avtomobili 80-90 km sürətlə hərəkət etdirib.



Qeyd edək ki, “Kəpəz Hospital”ın zamanında mərhum sabiq millət vəkili Mahir Aslanova məxsus olmasına dair mətbuatda çoxsaylı məlumatlara rast gəlmək mümkündür.