Avtomobil bazarında istifadə olunmamış kimi təqdim edilən, lakin istehsal tarixindən uzun müddət keçmiş təkərlərin satılması ilə bağlı narahatlıqlar artır. Bu vəziyyət sürücülərin təhlükəsizliyi baxımından ciddi risklər yaradır və yol hərəkəti təhlükəsizliyi məsələsini gündəmə gətirir. Əsas sual isə ondan ibarətdir ki, belə təkərlərin istifadəsi nə dərəcədə təhlükəlidir və vətəndaşlar təkər alarkən hansı məqamlara diqqət etməlidir.

Xeberpost bildirir ki, məsələ ilə bağlı Demokrat.az-a açıqlama verən nəqliyyat eksperti Eldəniz Cəfərov bildirib ki, bu problem təəssüf ki, Azərbaycanda ehtiyat hissələri bazarında uzun illərdir mövcuddur.

"Hətta bununla bağlı bir neçə cinayət işi də olub. Avropadan gətirilən köhnə təkərlərin üzərinə müəyyən naxışlar vurularaq onların yeni və ya az işlənmiş təkər kimi satılması halları müşahidə edilib. Hazırda belə halların davam edib-etmədiyi dəqiq bilinməsə də, risk hələ də qalır. İşlənmiş və artıq ömrünü başa vurmuş təkərləri yeni adı ilə alıb avtomobilə quraşdırmaq və bu vəziyyətdə nəqliyyat vasitəsini idarə etmək çox riskli və təhlükəlidir. Avtomobilin manevr qabiliyyəti birbaşa təkərlərlə bağlıdır. Xüsusilə sürüşkən yollarda və yağışlı havalarda tormoz məsafəsi xeyli uzana bilər. Bundan əlavə, yüksək sürətlə hərəkət zamanı belə təkərlər qəfil partlaya bilər ki, bu da ağır qəzalarla nəticələnə bilər".

Ekspert bildirib ki, vətəndaş köhnə təkər alarkən bilməlidir ki, onun istifadə müddəti qısadır və əlavə risklər yaradır.

"Ümumiyyətlə, alıcıların əksəriyyəti təkərin vəziyyətini vizual olaraq düzgün qiymətləndirə bilmir. Sadəcə baxışla təkərin köhnə və ya az işlənmiş olduğunu dəqiq müəyyən etmək çətindir. Bu səbəbdən vətəndaşlara yeni təkər almaq tövsiyə olunur. Köhnə təkərlər yalnız müvəqqəti hallarda, məsələn, yolda təkər zədələndikdə qısa məsafə qət etmək üçün ehtiyat variant kimi istifadə oluna bilər. Lakin belə təkərlərlə uzunmüddətli istifadə və xüsusilə magistral yollarda hərəkət təhlükəlidir".

Onun sözlərinə görə, təkərin protektor dərinliyi müəyyən normaya uyğun olmalıdır.

"Təəssüf ki, bəzi sürücülər bu məqama diqqət yetirmir və artıq yeyilmiş, istismar müddəti bitmiş təkərlərdən istifadə edirlər. Xüsusilə payız-qış mövsümündə bu cür hallara tez-tez rast gəlinir ki, bu da qəza riskini daha da artırır. Bu problemlərin qarşısını almaq üçün yeni və standartlara uyğun təkərlərə üstünlük verilməsi vacibdir".