Xəbər verdiyimiz kimi, “Liv Bona Dea” Hospital “Əli və Nino” kitab mağazasının sahibi Nigar Köçərlini məhkəməyə verib.

Xeberpost bildirir ki, axşam.az-ın məlumatına görə, buna səbəb kimi hospitalın nüfuzauna xələl gətiriləcək paylaşımların edilməsi göstərilir. Belə ki, xəstəxanada əməliyyat olunan Nigar Köçərli sosial şəbəkə hesabında tibb müəssisəsində ona biganə yanaşıldığını və baxımsız vəziyyətdə qaldığını açıqlamışdı.

N.Köçərlinin həyat yoldaşı Şahbaz Xuduoğlu sosial şəbəkədə paylaşım edərək, xəstəxananın onlardan tələb etdiyi təzminatı açıqlayıb:

"İctimai imicini və işgüzar nüfuzunu düşünən bir xəstəxana ilk növbədə insanı düşünməlidir. Bir xəstəxana pasiyentini məhkəməyə verərək ondan 222.395 manat tələb edirsə, bu artıq tibbi deyil, ictimai və mənəvi məsələdir. Pasiyent narazılıq ifadə edibsə, onu yüz minlərlə manatlıq iddia ilə susdurmağa çalışmaq yox, onu dinləmək, səbəbi araşdırmaq və yardım etmək yolu seçilməlidir. Xəstəxana hüquq bürosu deyil. Onun gücü məhkəmə qərarlarında deyil, pasiyentə göstərdiyi qayğıdadır. Əgər hər bir narazılıq məhkəmə iddiası ilə cavablandırılacaqsa, onda səhiyyə sistemi müalicə sistemi yox, hüquq-mühafizə mexanizmə çevrilmiş olar. İctimai imic məhkəmə sənədləri ilə deyil, insanlara münasibətlə formalaşır".