Uzunmüddətli münasibətlərdə gündəlik həyatın yaratdığı monotonluq tərəflər arasındakı emosional yaxınlığa təsir göstərə bilər. Mütəxəssislərin diqqət çəkdiyi "2:2:2 qaydası" isə münasibətlərə yenidən rəng qatmaq üçün sadə üsullardan biri kimi təqdim olunur.

Xeberpost "Libertatea" nəşrinə istinadən xəbər verir ki, bu metod üç əsas prinsipdən ibarətdir: hər iki həftədən bir romantik görüş, iki aydan bir yalnız ikiniz üçün həftəsonu və iki ildən bir birlikdə bir həftəlik tətil.

Qaydaya əsasən, cütlük hər iki həftədə gündəlik qayğılardan uzaqlaşaraq yalnız bir-birinə vaxt ayırmalıdır. Bunun üçün bahalı restorana getmək vacib deyil. Birlikdə film izləmək, parkda gəzmək və ya sakit şəkildə kofe içmək də kifayət edə bilər. Bu zaman telefonlardan uzaq qalmaq və diqqəti münasibətə yönəltmək tövsiyə olunur.

İkinci mərhələ iki aydan bir birlikdə həftəsonu keçirməkdir. Bunun üçün uzaq səfərə çıxmağa ehtiyac yoxdur. Yaxın şəhərə qısa səyahət və ya şəhərdən kənarda bir gecə keçirmək də gündəlik rutindən uzaqlaşmağa kömək edə bilər.

Üçüncü prinsip isə iki ildən bir yalnız ikiniz üçün bir həftəlik tətil planlaşdırmaqdır. Belə səfərlərin yeni xatirələr yaratmağa və tərəflərin bir-biri ilə emosional bağını yeniləməyə imkan verdiyi bildirilir.

Mütəxəssislər qeyd edirlər ki, bu metodun tətbiqi üçün böyük məbləğdə pul xərcləmək vacib deyil. Əsas məsələ tərəflərin bir-birinə müntəzəm şəkildə vaxt ayırmasıdır. Məsələn, romantik görüş üçün parkda piknik etmək, həftəsonu üçün isə yaxın əraziyə qısa səfər təşkil etmək mümkündür.

Məqalədə vurğulanır ki, əvvəlcədən planlaşdırılan bu görüşlər və səfərlər cütlüklərdə birlikdə vaxt keçirmə ilə bağlı müsbət gözlənti yarada bilər. Eyni zamanda tərəflərin bir-birini gündəlik məsuliyyətlərdən kənarda yenidən kəşf etməsinə şərait yaradır.

Beləliklə, "2:2:2 qaydası" münasibətlərdə diqqəti və birgə keçirilən vaxtı sistemli şəkildə artırmağa yönəlmiş bir yanaşmadır.//demokrat