"Məktəblilərin çanta ağırlığı təkcə pedaqoji deyil, həm də sosial və sağlamlıq yönümlü ciddi problemdir. Şagirdlərin hər gün daşıdıqları çoxsaylı dərslik və iş dəftərləri onların fiziki sağlamlığına mənfi təsir göstərir, dərsə hazırlığı çətinləşdirir və təhsilə marağı azaldır".

Bunu açıqlamasında təhsil eksperti Kamran Əsədov bildirib.


O, qeyd edib ki, Ümumdünya Səhiyyə Təşkilatının normalarına görə, çantanın çəkisi uşağın bədən çəkisinin 10 faizindən çox olmamalıdır. Lakin hazırda ibtidai sinif şagirdlərinin çantaları 5–7 kiloqrama çatır ki, bu da normadan iki-üç dəfə artıqdır. Nəticədə uşaqlarda onurğa əyrilikləri və bel ağrıları müşahidə olunur:

"Elm və Təhsil Nazirliyi problemi aradan qaldırmaq üçün rəqəmsal dərsliklər, elektron resurslar və əlavə iş dəftərlərinin azaldılması istiqamətində addımlar atır. "Rəqəmsal məktəb" layihəsi bu sahədə əsas islahatlardan biridir.

Dünya təcrübəsi göstərir ki, Finlandiyada dərsliklər elektron formadadır, Sinqapurda "split-book" sistemi tətbiq olunur, Türkiyədə isə iki nüsxəli kitab sistemi ilə çanta yükü azaldılır.

Lakin Azərbaycanda hələ də bütün məktəblər elektron infrastrukturla tam təmin olunmayıb, bəzi yerlərdə planşet və internet çatışmazlığı mövcuddur.

Çanta ağırlığı probleminin həlli təhsil sisteminin modernləşməsi ilə sıx bağlıdır. Nazirliyin rəqəmsal layihələri və yeni dərslik formatları uşaqların sağlamlığını qorumaqla yanaşı, valideynlərin xərclərini azaldacaq və şagirdlərin məktəbə marağını artıracaq".//big.az