Maraqlıdır ki, MÜTDA-nın rəhbəri inzibati xətanı törətməkdə təqsirli bilinərək cərimə olunur, işdən uzaqlaşmaq əvəzinə özünə müavinlər götürür. Digər rəhbərin isə gözləntiləri reallaşmır.
Bu günlərdə Agentliyin direktoru Eşqi Bağırovun müvafiq əmri ilə Fəttah Fəttayev və Turanə Məcidli BŞTİ-nin müdir müavini vəzifəsinə təyin ediliblər.

Bu səbəbdən də qurumun rəhbəri olan Eşqi Bağırov hələ bir müddət öz işində qalacağı anlamını verir.Lakin iddialara əsasən, bu post uğrunda mübarizə aparan şəxslərdən biri Abşeron-Xızı Regional Təhsil İdarəsinin müdiri İlhamə Abdullayevadır.

Bildirilir ki, böyük maddi imkanlara malik olan İlhamə Abdullayeva bu vəzifəyə təyin olunmaq üçün fəal şəkildə çalışır. İlhamə Abdullayevanın bu istiqamətdə “Körpü-Bina-Tikinti” MMC-nin rəhbəri, dayısı Xəlil Göyüşov tərəfindən də dəstək aldığı deyilir.

Bununla belə, Elm və Təhsil Nazirliyindəki mənbələrdən əldə edilən məlumata görə, nazir Emin Əmrullayev isə bu vəzifəyə İlhamə Abdullayevanı deyil, tamamilə başqa bir şəxsi təyin etməyi planlaşdırır.

Qeyd edək ki, zaman-zaman İlhamə Abdullayeva ilə bağlı mediada müxtəlif iddialar yer alıb. Onun adı müxtəlif qalmaqallar, biznes fəaliyyəti, həmçinin Abşeron–Xızı Regional Təhsil İdarəsinin tabeliyində olan təhsil müəssisələrindəki narazılıqlar və çatışmazlıqlarla hallandırılıb. Eyni zamanda, mediada onun gözəllik salonları biznesinə sahib olduğu barədə də məlumatlar yayılıb.
Ümumiyyətlə Abşeron–Xızı Regional Təhsil İdarəsinin tabeliyində olan təhsil müəssisələrindəki narazılıqlar bir başa İlhamə Abdullayevanın bu sahəni ciddi nəzarətdə saxlamadığıvə ya müxtəlif tapşırıqlar əsasında işlədiyi də vurğulanır.

Təsadüfi deyil ki, mətbuatda yayılan məlumata görə Abşeron-Xızı regional Təhsil İdarəsinin müdiri İlhamə Abdullayeva 26 milyonluq yeyinti edib.

Xeberpost bildirir ki, bu barədə Maliyyə və Elm və Təhsil nazirlikləri birgə məlumat yayıb.
Məlumatda deyilir ki, bu yeyinti idarənin tabeliyində olan 103 ümumi, 6 məktəbdənkənar və 96 məktəbəqədər təhsil müəssisəsini əhatə edir.

Xatırladaq ki, bu günlərdə məhkəmənin qərarı ilə Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov İXM-nin 539.3-cü maddəsi ilə nəzərdə tutulmuş inzibati xətanı törətməkdə təqsirli bilinib və bu Məcəllənin 116.1-ci maddəsinə əsasən şərti olaraq 2.000 manat məbləğində cərimə olunub.
Belə çıxır ki,hər iki rəhbər korrupsiyaya bulaşıb və təhsilin inkişafı barədə nəsə demək çətin olacaq.Əlac qalır cənab nazir Emin Əmrullayevə.Qərarı o versin.
Qarşı tərəfin məsələyə münasibətini qərc etməyə hazırıq.