"Vətəndaşlara qarşı dələduzluq halları baş verdikdə hüquq-mühafizə orqanları araşdırma aparır və zərərin məbləğinə uyğun olaraq təqsirkar şəxsin məsuliyyətə cəlb edilməsini təmin edir".

Bunu açıqlamasında vəkil Rəşad Əliyev bildirib.

.
O, qeyd edib ki, dələduzluq — etibardan sui-istifadə və ya aldatma yolu ilə özgənin əmlakını ələ keçirmə və ya əmlak hüququnu əldə etmə — həm inzibati, həm də cinayət məsuliyyəti yaradır. Əgər ələ keçirilən məbləğ 500 manatdan azdırsa, bu, inzibati xəta sayılır və İnzibati Xətalar Məcəlləsinin 227-ci maddəsi ilə məsuliyyət nəzərdə tutulur. 500 manatdan çox olduqda isə Cinayət Məcəlləsinin 178-ci maddəsinə əsasən cinayət işi açılır:

"Zərərçəkmiş şəxs istintaq və məhkəmə dövründə mülki iddia verə bilər. Məhkəmə həm cinayətə hüquqi qiymət verir, həm də zərərin ödənilməsi barədə qərar çıxara bilər. Dələduzluq edən şəxs həbs olunsa belə, borcu ödəmək öhdəliyi qalır və məhkəmə qərarını icra etmədiyi halda əlavə məsuliyyət daşıyır.

Zərər ödənildikdə və tərəflər barışdıqda təqsirləndirilən şəxs məsuliyyətdən azad edilə bilər. Əgər dəymiş ziyan ödənilərsə və məbləğ xeyli olduqda 25%-i, külli olduqda isə 50%-i dövlət nəfinə ödənərsə, bu halda cəza təyin olunmaya bilər. Əks halda, şəxs qanunla müəyyən olunmuş cəzanı çəkməlidir".//big.az